O. Rent Kuruma

之前講過，沖繩本島話大唔大，話細唔細，大概有香港三倍大細，直線長度約103Km，如果自駕由南到北，都需時近三個鐘，為咗節省時間，所以好多人都會選擇上高速去追時間，但實際上又會快幾多，高速又有咩規矩要遵守？今次由O.Rent分享一下。

沖繩本島主要有兩條公路

• 國道58
  

國道58係一條由鹿兒島到沖繩嘅一般國道，全長約880Km，屬全日本最長嘅國道，但有中間有成635Km係屬海路。喺沖繩段，由最北嘅國頭村開始，經過名護、恩納、美國村等西岸沿線地方，到達壺川附近嘅明治橋完結。國道58以前係美國民政府嘅軍道，喺二戰時成為美軍後勤路線助美軍攻佔沖繩。之後喺美治時期被指定為政府道一號線，期間美軍係可以優先使用國道58，甚至唔俾當地人經過，去到1972年沖繩歸還日本之後先正式開放俾當地人用。

沖繩高速公路

正名係”沖繩自動車道”，編號為E58，全長約57Km，屬全日本全南同全西嘅高速公路。由許田交流站開始，經過宜野座、石川、北中城等地方，到達首里城附近嘅那霸IC站結束。有別於國道58，沖繩自動車道係行沖繩東邊嘅架空天橋，亦因為太短關係，所以都只設有一個PA (Parking Area)同一個SA (Service Area)，分別係中城PA同伊芸SA。

高速公路固名思義，行駛速度會比國道58略快，但係因為路線喺東邊，而大多旅遊景點都集中喺西邊嘅關係，所以實際時間上唔係快好多，以美國村起點為例：

行高速到許田休息站，所需時間係44分鐘46Km
行國道到許田休息站，所需時間係67分鐘42.7Km

相差只有20分鐘，而收費則需要約¥1,000，抵唔抵就見人見智。

另外高速公路嘅規矩同國道係唔同，例如

• 入口

沖繩高速公路入口有兩款 

1. ETC專用入口
會以藍色標示。如果有租用ETC卡先可以行嘅通道，過機時請以時速20公里或以下速度通過。如果冇裝到ETC點算？放心沖繩大多IC入面都會有職員留守，所以叫佢哋幫手就得。

2. 一般入口
會以綠色標示，一般入口操作好簡單，進入高速時會有票機，拎票後唔好唔見，直到離開高速時俾票俾職員，之後會顯示價錢，付款後就可以離開，付款方式可接受現金或信用卡。

• 限速

喺國道一般冇指明速度嘅路段，最高60Km/h但沖繩高速公路係80Km/h*

*日本本島係100Km/h

• 快線

喺國道係冇快慢線之分，只要行自己正常嘅路線就點行都得。但喺高速上，右邊線係叫「超車道」只可以喺超車時先可以行，如果長時間佔用而又唔係超車，係會被警察捉或者俾後車推+狂閃。

• 快相
  

有一部固定位置嘅快相位設喺沖繩高速上面，另外仲會有五部移動式設喺唔同位置(通常係高速之上)，一經被影快相，係會產生罰款！罰款會以超幾多計算

超速未滿15Km/H 罰款¥9,000
超速超過30Km/H未滿35Km/H 罰款 ¥25,000
超速超過35Km/H未滿40Km/H 罰款 ¥35,000
超速超過40Km/H罰款 ¥100,000
唔好以為俾錢可以了事，日本警方仲會視乎情況嚴重性去追加其他刑罰。

• 隱形戰車

高速上係特別多隱形戰車，所以就算唔喺快相位，超速都有機會被捉。一般隱形戰車都會貼上茶色玻璃，車款由Crown到GTR都有可能，所以最佳方法都係唔好超速。

沖繩高速係全日本ETC Card使用率最低嘅地區，只有66% (2021年數據)。因為一般景點如parco city、美國村、殘波岬、琉球村、恩納駅、万座毛等都會集中喺西海岸沿線，如果上高速就會顯得唔順路。加上時間又唔爭得多，價錢又唔平，距離又變得長咗，又冇風景睇。所以一般都比較唔建議上高速，如果唔夠路面交通經驗，更加唔好嘗試挑戰。

如果真係要上高速，一定要小心交流道同收費口，因為沖繩喺依兩處發生過意外係冠絕整個關西地區，所以一定要留心，小心駕駛，安全第一。

PS. 去沖繩的話，記得搵我哋租車 

#沖繩旅遊 
#沖繩
#自駕遊
#香港人
#Okinawa
#o_rentkuruma
FB: 老hike都移民