沖繩遊記 – Costco
美國大型連鎖超市Costco於2024年8月24日終於登陸沖繩，開業當日人頭湧湧，導致南部交通擠塞，附近嘅高爾夫場有近百客人需取消預約，究竟Costco有咩特別呢？
事隔幾日，店長喺附近工作完之後嘗試過去潮聖。當日交通已經冇開業咁誇張，只係等入停車場停咗大概30分鐘左右。停車場屬露天停車場，因為唔係立體停車場關係，放到嘅車輛數量唔算好多，官方聲稱可以放到830台車，但當日感覺唔到可以放咁多，可能停車場尚未完成。
Costco
係行會員制，全部入場人仕都需要出示印有自己樣貌嘅會員卡先可以進場，門口會有職員同大家人手核對身份。而會員卡係屬全球通行，所以如果之前曾經登記過嘅，唔需要再喺日本再申請。如果無會員卡，都可以即場申請，不過現場只接受居日人士登記，亦要出示在留卡/車牌/保險卡做証明文件，所以無會員卡嘅旅客可以慳返。
另外因為Costco只接受現金同埋Master Card消費，所以進場前請確保自己有足夠嘅現金或Master Card結帳，如果冇的話，喺tire center都有ATM機提款。
場內都頗大，除咗會有一般超市有嘅貨物之外，仲會有大型電器如雪櫃、電視等，連PS5、XBOX、Ipad等都有counter，最驚喜係有Space X嘅Starlink，可惜未見有starlink mini。
另外仲有衣服、玩具、鞋等發售，款式就見人見智。
而一般超市貨物如肉類、海鮮、蔬菜、水果等都有提供，但全部貨物係都用KG做單位….就連零食都係mega size，買擦膠都要一買就係8個。不過價錢真係相對便宜，買5kg 北海道洋蔥都只係¥800，暫時見過沖繩內最平。
除咗食材類之外，場內仲有熟食如炒飯、三文治、沙律、壽司、Pizza等供應，不過全部都係到會size…如果人多開party都可以考慮下。
離場前，仲有個同香港ikea一樣嘅小食亭發售熱狗、Pizza、汽水等小食，同ikea一樣，熱狗係要自己加sauce，汽水都係無限 refill，而個質素亦都同ikea一樣…. 試完就算了。
如果大家有場內購物，離場前記緊要保留收據，因為離開時會有職員同你對單，確保無遺留貨物。
總括而言，Costco位置太偏遠(南城近玉泉洞)，加上要會員費同埋冇得退稅關係，如果係旅客專登過去完全唔化算。場內雖大，但因為貨物都大嘅關係，所以種類唔算特別多。幸好Costco油站係平絕全沖繩，加上黑卡有分儲，所以都叫有啲價值。
後記: 大阪朋友告之，Costco要平，係等佢做特價，所以都係遲啲先再去
PS. 去沖繩的話，記得搵我哋租車
#沖繩遊記
#沖繩旅遊
#沖繩
#自駕遊
#香港人
#Okinawa
#o_rentkuruma
FB: 老hike都移民
留言
發佈留言