去過日本自駕之後會發現，日本有好多個道之驛（道の駅），究竟道の駅係咩黎呢？
道の駅官方英文翻譯為Road station，固名思義係設於道路嘅休息區，同喺高速公路嘅SA（Service Area）PA（Parking Area）作用類似。但道の駅係設喺一般國道附近，除咗為大家提供24小時嘅免費嘅停車場、洗手間休息之外，仲係為咗推廣當地特產、文化交流、景點推介等而設。所以每一區嘅道の駅都充滿咗該區特色，而沖縄県內就有10個道の駅，今次就分享依10個道の駅嘅特色同位置
糸満駅（いとまん）就正正係鼎鼎大名嘅糸満漁市場，同時仲係全日本最南嘅道の駅，亦係沖縄県內最大嘅道の駅，佔地接近30萬平方米。糸満駅內除咗設有好出名嘅漁市場之外，仲有糸満市物産center賣當地嘅手工藝品，連專做農產品直賣嘅Farmar Market都喺依度。順帶一提，因為糸満同北海道網走市係好友關係，所以可以喺糸満駅買到北海道嘅毛蟹。
豊崎駅（とよさき）係全日本最西嘅道の駅，位置喺豊見城市內，附近就係好出名嘅DMM水族館。喺糸満駅未出世前，豊崎駅唔單止係全日本最西，仲係全日本最南嘅道の駅，所以都好多人慕名而來。豊崎駅最大特色係佢個Farmer Market（JAおきなわ）係由JA女性俱樂部開，從生產、包裝到出售等都係女性做主。所以都吸引唔少支持者。另外因為豊見城市係沖繩本島芒果產量最多，所以又有名為「芒果之鄉」（ マンゴーの里）。
大宜味駅（おおぎみ）可以買到大宜味同久米島嘅當地特產，亦有單車出租，可以換乘單車漫遊一下附近嘅景色。另外依個大宜味駅內最大特色係有個遊客中心，用投影及VR方式介紹Yanbaru (やんばる)，令大人同小朋友好似身處森林之中。
嘉手納駅（かでな）位於在日美軍嘅嘉手納空軍基地對面，亦因為咁，喺嘉手納駅嘅4/F 設有觀望台俾大眾欣賞美國空軍嘅升降。同時喺3/F亦有學習室簡單講述美軍點解會駐守沖繩同現時喺沖繩大概軍力。亦因為近美國空軍基地，依個嘉手納駅內嘅餐廳都比較美式風格。
許田駅（きょだ）係沖縄県第一個道の駅，亦都係一個相當受歡迎嘅道の駅，因為喺許田駅內，係有特價門票發售，包括美麗海水族館、水果樂園、琉球村、NEO Park等等，雖然價錢唔係最優惠，但勝在夠彈性同方便，所以都吸引唔少遊客購買。
喜納番所駅（きなばんじょ）位於読谷村內，喜納番所駅喺琉球時代係要黎做連繫首里城同北部機關嘅政府部門黎，曾經熱鬧一時，但因為交通、通訊等發展問題，導致大家都漸漸忘記佢。喜納番所駅最大特色就係無餐廳、無商店（但對面街就已經有商戶），只有一個好熱情嘅婆婆幫手介紹附近景點做customer service。喜納番所駅內亦只有最低限度如洗手間、wifi等配備，如果經過開都可以停一停去個洗手間，休息一下。
宜野座駅（ぎのざ）唔單止有遊客中心、餐廳，佢仲係少數有兒童遊樂場嘅道の駅嚟。唔單止係有兒童遊樂園，仲有個水深只有10cm嘅嬉水池俾大家享用，更可以租用BBQ場。所以一到夏天宜野座駅就極度受歡迎，另外順帶一提，因為由2003年開始，日本棒球隊 — 阪神虎，每年春天都會到宜野座camping，所以宜野座駅內係會見到好多關於阪神虎嘅展品及有佢哋Pop up shop。
東村駅（サンタイズひがし）位於国頭郡東村內，因為位置偏遠，同時又遠離遊客區，所以平常都唔多遊客。同樣東村駅內都有售賣東村特產（多達十種嘅菠蘿），餐廳、洗手間等，對有興趣遊覽沖繩東岸線嘅朋友黎講都係一個唔錯嘅休息站。
YuiYui国頭駅（ゆいゆいくにがみ）係沖縄県最北嘅道の駅，亦係少數有兒童遊樂場嘅道の駅之一。因為位於地理位置問題，YuiYui国頭駅內嘅特產係比其他道の駅多，有由野豬同家豬混合而生嘅イノブタ、有国頭村茶葉、仲有大量農作物。餐廳方面因為都用返農家雞、豬、菜等。所以都相當出色。順帶一提，依個係去沖繩最北 — 辺戸岬路上嘅最後一個道の駅，所以要休息同補給就最好喺依度做好。
安波駅（やんばるパイナップルの丘安波）係沖縄県內第十個道の駅，位於國道70上面，同位於國道58嘅YuiYui国頭成對比。亦係全沖繩內唯一一個有提供Camping服務嘅道の駅。另外安波駅嘅英文名係Pineapple hills，叫得自己菠蘿之丘，菠蘿當然係佢嘅特產。但最令安波駅自豪嘅地方，係叢林裡面嘅動植物，仲話連空氣都可以療傷，有興趣嘅朋友不妨去試下。
以上10個就係沖繩內嘅道の駅，可能大家會發覺有部份如：恩納の駅榜上無名嘅？係因為道の駅係日本公路嘅設施，所以要由國土交通省登錄認可先得，有部份只係叫自己做駅而唔係道の駅。所以果Ｄ唔作介紹了。
如果大家去沖繩有興趣，不妨去晒依10個道の駅打卡同觀光。
PS. 去沖繩的話，記得搵我哋租車
#沖繩旅遊
#沖繩
#自駕遊
#香港人
#Okinawa
#o_rentkuruma
FB: 老hike都移民
.jpg)
留言
發佈留言