O. Rent Kuruma

大家去日本旅行時，應該會見過寫住宝くじ嘅店，睇個門面都知係買六合彩、彩卷等博彩卷嘅地方，但究竟係點玩法，要幾錢先可以參與，中咗又有幾多獎金，今次就會由O.Rent黎分享下。 頭盔MODE: 日本需要20歲以上才可以參與博彩活動，違者將會被檢控。 宝くじ，中文強行翻譯應該係抽寶藏。係一個日本人好鍾意嘅博彩活動，因為頭獎係講緊億億聲(日元)，所以好多平民都係發依個頭獎夢。玩法就同以前香港嘅童軍彩票（台灣的愛國獎卷）差唔多。首先要選擇參與嘅項目 因為宝くじ嘅收益係會有公眾用途，如第1041全国自治宝くじ嘅收益係for2025日本国際博覧会之用，所以每個項目都有背後意思。除此之外，每個項目都有佢哋唔同嘅彩池，即係中頭獎金額同埋開彩日期都唔同，而彩池大小都會影響每張彩卷嘅價錢，所以買之前要先了解清楚。 彩卷一般￥100 ~ ￥300/張，十張為一本，每本番號由尾數0-9相連，稱為連番（れんばん）當然亦可以選擇非連號（ばらし），連番有個好處係必定會中獎，下面會解釋。 而彩卷上有兩個重要嘅數字 — 組號、番號，組號由001 ~ 200組成，而番號就有10,000 ~ 199,999咁多，喺彩卷下面有開彩日（抽せん日），喺當日上官網對number就得，至於點為之中獎，首先要睇買宝くじ定係ミニ(mini)： 宝くじ有非常多獎項，分別係 1等 – 組、番號全中 1等の前後賞 – 同一等獎同組但番號前後 1等の組違い賞 – 同一等獎唔同組但番號一樣 2等 – 組、番號全中 3等 – 只需中番號 4等 – 只需中尾4個番號 5等 – 只需中尾3個番號 6等 – 只需中尾2個番號 7等 – 只需中尾1個番號 可能會有啲複雜，唔緊要，就係因為咁，所以有Mini版(ミニ) Mini版比起上黎就簡單得多 1等 – 組、番號全中 1等の前後賞 – 同一等獎同組但番號前後 2等 – 只需中番號 3等 - 只需中尾3個番號 4等 - 只需中尾2個番號 5等 - 只需中尾1個番號 成件事簡單好多，但亦因為咁，彩池都細好多（7億同3000萬嘅分別…） 中獎後拎彩卷去發售點就可以領獎，唔知自己有冇中獎都唔緊要，照樣將彩卷拎去發售點，職員都同樣會幫你對。至於上面點解話連番一定會中獎，就係因為尾數0-9都會有，不論宝くじ定係ミニ嘅安慰獎係一定中，所以如果想感受入領獎感覺，不妨買個連番玩下。 覺得好慢又複雜？宝くじ...

每年一月至三月，喺沖繩海域都會出現大量座頭鯨，究竟點解會有座頭鯨、點樣先可以見到座頭鯨、觀鯨又有咩要注意，今次會由O.Rent去分享下 座頭鯨係屬遷移性動物，喺夏季時會喺俄羅斯、阿拉斯加一帶嘅北部海域生活儲能量，到秋季就會因為需要去熱帶或亞熱帶水域交配繁殖關係，開始往南遷移，到春季經過25,000km嘅遷移後到達沖繩附近水域交配、生育、孕育鯨魚BB。所以喺每年一月至三月份相當容易喺沖繩水域見到座頭鯨。 成年座頭鯨長12~16呎，剛出世嘅BB都長3~6呎，一般都係單獨生活或由鯨魚媽媽帶住BB出海學習。群體出現機會唔大。但有時都會見到一堆雄性座頭鯨為咗求偶圍住一條雌性。 雖然座頭鯨身形巨大，但個性溫馴且好奇心大，所以會經常同人類近距離接觸，而且雄性嘅座頭鯨更會利用叫聲去吸引異性。然而座頭鯨並唔係魚類，所以每隔一段時間就需要上水換氣，每次換氣長達5分鐘以上。當座頭鯨浮上水面之後，就會透過頭上嘅氣孔換氣，因為排出嘅空氣溫度較高、壓力較大，所以一排出之後就會出現冷凝反應變成霧氣，就成為大家成日見到嘅「噴水」。除咗換氣之外，有時座頭鯨仲會做出「尾部拍擊」、「胸鰭拍擊」「躍身擊浪」等唔同動作。 座頭鯨數量曾經最高峰有150,000條，但一度因為人類嘅大量捕獵跌到去只淨返450條嘅瀕危絕種類別。後來因為頒佈＂全球禁止捕鯨公約＂後，座頭鯨數量已澌澌脫離瀕危類別，現時保守估計有約35,000條生活喺海洋。 因為座頭鯨體形龐大，加上要上水換氣嘅關係，喺適合嘅月份下唔難見到。但其實觀鯨唔一定要出海，喺岸邊都有機會見到。 美麗海水族館 座頭鯨遷移路線會由北部經過沖繩西邊南移到渡嘉敷島、座間味島附近，所以路線上會經過伊江島，而美麗海水族館就正正對住伊江島，如果好運，隨時可以喺水族館對出見到座頭鯨。 殘波岬 往南游嘅座頭鯨，除咗會經過伊江島外，仲會喺殘波岬嘅西邊經過，而殘波燈塔能令大家視野更廣闊，所以更大機會見到座頭鯨，不過建議大家準備望遠鏡，如果唔係會唔肯定係白頭浪定係座頭鯨。 Gala 青い海 同殘波岬同屬同一海域，但Gala 青い海仲有餐廳、騎馬中心、潛水中心等唔同設施，所以可以一邊等待座頭鯨嘅同時，一邊享受一下沖繩嘅海景。 可以睇到座頭鯨嘅地方又點止咁少，一切都係講求緣份。但如果出海的話，有非常大機會見到，但參加觀鯨團記住要幫襯有經驗、專業嘅觀鯨團。畢竟想安全唔影響到鯨魚生活，唔單止要駕...

一年一度嘅沖繩賞櫻活動終於喺2025/01/05由那霸開出嘅第一個櫻花開始，今年櫻花比上年早咗8日開。同往年一樣，喺各區嘅都會舉行唔同嘅櫻花祭，所以今年都會分享返有咩賞櫻好地方 PS. 想了解賞櫻、夜櫻、櫻花祭? 請睇返 賞櫻2024 今歸仁城跡 今歸仁櫻花祭將於2025/01/25 ~ 2025/02/02喺今歸仁村內今歸仁村城跡舉行。 開放時間係每日08:00 ~ 21:00 最後入場時間係20:30。 留意返係要收取入場費 八重岳櫻之林公園 八重岳櫻花祭將於2025/01/18 ~ 2025/02/02 喺本部町內櫻之林公園舉行。 因為唔駛入場費，所以係全日開放。 值得一提係，喺八重岳櫻之林公園內，係有機會望到座頭鯨！所以賞櫻同時，記住留意海面情況。 名護中央公園 名護櫻花祭將於 2025/01/25 ~ 2025/01/26喺名護市內名護中央公園舉行。 入場時間係11:00 ~ 21:00。 畢時會有封路措施，恭請留意。 漫湖公園 那霸美麗櫻花祭將於那霸市內漫湖公園中央噴水廣場舉行。 實際時間尚待公報。 八重瀨公園 八重瀨櫻花祭將於2025/01/20 ~ 2025/02/02 喺八重瀨公園舉行。 開放時間係每日08:00 ~ 21:000 再次提一提大家，去欣賞櫻花時，記住: 請勿折枝 請勿醉酒駕駛 請將車輛泊到適當位置 自己垃圾自己帶走 自駕要搵O.Rent租車 做個有質素嘅旅客，咁先可以受當地人尊重 PS. 去沖繩的話，記得搵我哋租車  #沖繩旅遊  #沖繩 #自駕遊 #香港人 #Okinawa #o_rentkuruma FB:  老hike都移民

去旅行最擔心係撞正打風落雨時間，尤其係沖繩依類打風落雨多嘅地方。所以出發前一定會不停留意住天氣報告，求神拜佛要有好天氣。所以今次會分享沖繩天氣通常係點。 先要了解沖繩地形先。 沖繩本島如果由最南嘅喜屋武岬計起，去到最北嘅邊戶岬直線距離長103km，即係由香港尖沙咀碼頭計起，去到佛山嘅直線長度。如果計台灣，就大概係基隆到花蓮的大小。 喺依個Size之下，南北部天氣好難統一，會經常性出現北部大雨水浸、南部陽光普照等極端情況。 其次沖繩四面環海，高山唔多，本島最高嘅與那霸岳先得503米，高樓大廈又唔多，所以導致沖繩相當大風，亦因為咁，沖繩天氣係變得極快，隨時上晝打風，下晝出太陽，所以會有「沖繩人落雨都唔用傘」甚至話「沖繩人屋企唔會有傘」依個講法。 一般而言，沖繩基本上每日都會落雨，尤其是零晨時份，但落嘅只係毛毛雨同好快完，除咗梅雨季或受颱風影響，甚少會出現豪雨或落全日。 除咗落雨之外，大家最擔心一定係颱風。每年大概會有25個左右颱風生成，而其中有7個左右會經過沖繩，但其實經過沖繩係指宮古島、石桓島、八重山群島等一帶，本島受影響嘅機會並唔多，所以唔駛太擔心。 另一個天災係地震，因為香港係一個無地震嘅地方，所以一聽到地震就會好緊張，但其實沖繩本島一年震最少廿次，但因為每次都係得一二級震度，近三年都只係錄得一次三級震度，所以喺沖繩係幾乎感受唔到有地震發生過。 亦因為沖繩本島地震規模弱，所以海嘯發生率亦唔高，相反近台灣嘅宮古、石桓等地區會比較大機會發生。 至於溫度方面，沖繩嘅冬天係非常之短，只有12-2月三個月時間，就算係冬天，平均最低氣溫都唔低於15°C，最凍都係得10°C。但因為日照強烈，導致日夜溫差好大，所以建議洋蔥式穿法。 Credit by: Smart Magazine 相反夏季時間係非常之長，由6月梅雨季結束後起，到10月底都依然炎熱，不過因為受海風影響，所以平均溫度都唔會超過30°C，但都係因為日照強烈，喺中午可隨時可以錄得35°C高溫，所以防曬用品係好重要。 總括黎講，沖繩係一個成日落雨，日夜溫差大嘅地方，但其實颱風侵襲本島機率並唔大，平時睇到新聞話沖繩又打風、又海嘯通常都係指石桓、宮古島等一帶。就算真係本島打風、海嘯，都不過係幾個鐘或一日嘅影響（除咗23年卡努），只要準備好plan B，買好旅遊保，風季都冇乜好怕。 PS. 去沖繩的話，記得搵我哋租車 ...

跨年，對於香港、台灣黎講就係出門狂歎慶祝嘅日子，但對日本人黎講，誇年係一個相對平靜嘅日子。 傳統上，日本人喺除夕日（日文：大晦日）當晚，  約埋親朋戚友聚喺屋企，煮吓蕎麥麵、食住年糕、熱住清酒，一齊喺屋企睇紅白大賽 (以前仲有絕對不能笑系列)。亦有部份人會去參加寺院、神社嘅跨年祁福法會，聽住象徵人生108種煩惱嘅除夕鐘聲迎接新嘅一年。 沖繩亦唔例外，所以跨年活動真係唔多，以下分享一下店長所知嘅 兒童王國 位於中部嘅兒童王國，係県內相當有名嘅動物園。喺12月下旬開始已經舉行緊晚上燈光show，喺除夕當晚，除咗有倒數活動外，兒童王國內更有多個活動，如歌舞表演、煙花表演、甚至有喪屍及恐龍出沒。不過留意返，兒童王國31號不設現場購票，所以要參加就要預先購票 詳情:  https://www.xmas-fantasy.com/ ANA Interco Manza beach resort 位於恩納嘅ANA Interco Manza beach resort，喺除夕當晚都有舉行跨年倒數活動，畢時會有三線、和太鼓等表演，喺倒數後更會有煙花表演。最正嘅係，活動係免費參加！但如果要泊車就收¥4,000/架 詳情:  https://www.anaintercontinental-manza.jp/offers/detail/?id=213 美國村 至於美國村呢，就官方網頁冇表明除夕當晚會有活動，連煙花都只係話24、25、26、28會有，不過美國村始終係不夜城，相信各界店舖都會有自發活動，BTW 如果真係要去美國村跨年，就要留意佢哋停車場開放時間，因為除夕當日全部停車場都會提早關閉，為免玩完冇車離開，所以要留意交通情況。 詳情:  https://www.okinawa-americanvillage.com/info20231226/ 國際通 最後國際通，作為沖繩地標，雖然官方無公佈有跨年活動。但一眾商舗都會喺除夕當晚延長營業時間，更加會有期間限定嘅街頭美食，同沖繩傳統嘅舞蹈表演，如果住附近就唔可以錯過。 日本真係唔多跨年活動嘅地方。相比跨年，日本人更加會重視一月一號嘅初詣。 初詣，即係新年（一般指1~3號期間)第一次去神社參拜嘅活動，畢時神社附近都會開滿攤檔，撈金魚、射汽球、掟飛鏢等唔少得，仲會有串燒、炒麵、章魚丸等美食。 如果喺沖繩跨年，不...

唔知大家喺日本自駕時，有冇試過上午行果時係3線行車，但夜晚行果時變咗4線行車？條中央線位置唔同咗？當遇上果時有咩需要注意？ 喺日本依個地帶叫中央線変移區，中文叫調撥車道，英文叫reversible lane。係會跟據車嘅流量而去改變車道嘅行車模式，打個比喻，A區上午時間因為多人返工返學，所以出市區方向開放4條行車線，相反夜晚時間因為出市區方向少車，所以就會將4條行車線改為3條，將其中一條行車線改為俾大家返Ａ區用。好處係可以改善交通情況，但唔好處係唔熟嘅情況可能會變咗逆線行車，相當危險。 中央線変移區喺外國有「自殺車道」嘅惡名，所以日本都有廢除嘅趨勢。依家喺沖繩，仲有兩段中央線変移區，分別係 ・国道507号・国道330号（那覇市在国場十字路口開始到旭町十字路口） ・県道29号線（那覇市在松川（西）十字路口開始到安里十字路口） 兩段路雖然都唔接近国道58，不過為免唔小心闖入，所以都要注意一下。 進入中央線変移區後，會有路牌清晰表示中央線位置，請緊記，係靠中央線嘅左邊行車，亦不要超越中央線。 除咗頭頂有中央線表示外，地下亦有閃爍嘅道路燈黎做分隔線，另外仲有指示燈好清楚提示邊條線唔行得。 如唔小心入錯車道，千萬唔好倒車！！只需打方向燈入返正確道路就得。 其實中央線変移區一啲都唔可怕，只需留意指示及減慢車速就得。就算錯都唔駛驚，因為本公司提供嘅車全部都有貼上外國人駕駛標示，所以其他車都會對我司車比較包容同忍讓。 PS. 去沖繩的話，記得搵我哋租車  #沖繩旅遊  #沖繩 #自駕遊 #香港人 #Okinawa #o_rentkuruma FB:  老hike都移民

一架車，除咗車身要靚仔，引擎要夠力之外，最緊要就係四條軚。如果本身係車主，打軚氣依啲基本野應該難唔到大家，但如果本身無擁有過車，甚至連單車都冇的話，就要留意了。 車軚，喺打氣前只係一個膠圈，冇負載能力。需要打氣後，先可以承載車身重量、行李重量、乘客重量等。如果車軚唔夠氣會令車軚偏軟，唔單上會增加油耗，仲會因為缺乏支撐力，影響過灣、煞車能力，嚴重仲會因為發熱效應導致爆軚，甚至交通意外。所以租車時必須注意軚氣。 一般黎講，租車公司交車前需檢查清楚一切包括車軚，但畢竟係人手作業，難免會有甩漏。如果Touch wood出車後先發覺唔夠軚氣要點處理，今次就分享一下。 軚氣，日文叫空気圧。同香港一樣，基本上加油站都會提供免費打氣服務，唔同嘅係，語言問題。聽過好多Case都話用google translate都唔係好清晰講到俾油站職員聽要做乜，甚至職員會以為係想換軚，所以最好學識自己打。 要自己打軚氣，首先要了解部車需要幾多kPa先。所需軚氣廠方已經印咗喺司機位度門上面，只要打開司機門就可以搵到，搵到之後就可以去搵打軚氣嘅地方。 油站一般會有個叫空気圧点検コーナー，翻譯係軚氣檢查corner。喺入面會有齊打軚氣所需嘅工具 — 氣泵，大致分兩隻： 電子自動式 電子式只需要輸入想要嘅Kpa，然後將氣咀同車軚連接上就會自動打氣，完成然會有聲音提示，方便快捷，不過因為電子式係會固定位置，所以車多情況下可能要排好長時間。 手動式 手動式就比較old School，將氣咀同車軚連接之後，要自己利用手制鬆緊度去調節打氣定放氣，揸緊係打氣，輕按係放氣。手動式好處係可以隨時拎起去任何位置，唔需要專登去檢查corner，喺繁忙時段好好用，不過記緊用完之後要放返原位補充空氣，如果唔係下手用就可能冇氣。 另外車上面都可能會有便攜式氣泵，只需要幫佢叉電後，就可以同電子自動式一樣用法，非常方便。 打軚氣方法好簡單，但有少少地方都要注意 請於車軚冷卻下檢查 因為車軚變熱後，氣壓會隨住溫度上升。所以會建議過去兩小時無使用或行駛少於兩公里嘅情況下檢查。 請緊遵建議kPa去打氣 雖然有部份車主會鍾意車身比較高而打大個kPa，但因為出租車嘅關係，喺唔了解情況下都係建議跟從廠方指示好了。 最重要係，如有任何問題，請即同租車公司聯絡。 天有不測之風雲，希望依編分享用唔著喺大家身上。 PS. 去沖繩的話，記得搵我哋租車...

香港地少人多、物價高昂，要買車已經唔容易，要養車更加難。所以除咗汽車發燒友外，一般大眾都對車款唔會有太多認知，更惶恐要了解車款大細、可載行李量、性能等，而日本車因為各式各樣問題，令到好多明明 spec 一樣，但名字唔同嘅車款出現，所以今次分享下有咩常見車係 twins Alphard / Vellfire Toyota Alphard ( 亞佛 ) ，相信唔係揸開車嘅人都會聽過佢個名。而 Vellfire 正正係 Alphard 嘅兄弟。 兩者因為都係用同一款底盤開發，所以不論長度、寬度、高度、軸距都完全一樣，但兩者外觀上就好唔同。 Toyota 將 Alphard 定位做商務級，形容 Alphard 係「優雅而精緻」。而 Vellfire 定位係比較前衛同年青，形容 Vellfire 「實力和強烈個性」。強調 Alphard 係追求舒適性， vellfire 就係追求運動性。所以兩者喺除咗外觀，車內配套都唔一樣。所以令好多人誤會係兩個 Size 嘅車。 Noah / Voxy 同樣係 Toyota，Noah 亦有佢嘅兄弟 – Voxy 。同 Alphard 情況一樣， Noah 同 Voxy 都係用同一款底盤開發，所以不論長度、寬度、高度、軸距都完全一樣。亦同樣地，兩者外觀、定位都好唔同。 Toyota 將 Noah 定位比較穩重，所以外觀方面都係比較保守同傳統風格。相反 Voxy 就行年青路線，外觀上比較花巧、前衛。不過兩者車內配套大致都係一樣，所以基本上依兩兄弟只係外觀上嘅分別。 另外，其實依兩兄弟仲有另一個兄弟 – Esquire ，不過因為市場佔用率完全唔及 Noah / Voxy ，所以 Toyota 喺 2021 年都宣佈停產 Esquire 。 Fit / Jazz 依架並唔係兄弟車，係根本同一架車，只不過喺唔同地方，佢就有唔同嘅名。屬於 Honda 嘅 Fit ，本名係叫 Fitta ，但因為瑞典話內， Fitta 係指 Pussy ，所以出世前將 ta 唔要，直接用 Fit 依個名。亦因為唔同嘅原因，導致香港、澳門、歐洲等地區要叫佢做 Jazz ，日本、台灣、美洲等要叫 Fit 。 Corolla Levin / Sprinter Trueno 要數兄弟車代表作，一定係 Toyota 嘅 AE86 。受到「頭文字 D 」影響，...

以往香港往返沖繩最夜嘅機只有HK airline嘅 HX658: HKG>OKA (11:30 > 15:00) HX657: OKA>HKG (16:00 > 17:50) 但由2024/11/01開始，Hk express將以往飛鹿兒島線嘅UO826、UO827改為沖繩線，時間將會係 UO826: HKG > OKA (15:50 > 19:20) UO827: OKA > HKG (20:15 > 22:15) 所以大家可以留喺沖繩嘅時間亦可以大幅延長，同時因為非繁忙時間關係，機場安檢時間都會大幅縮短，所以大家check in後會有更加多時間喺那霸機場度逗留。 當大家煩惱緊喺機場買咩手信嘅同時，唔知大家有冇興趣帶座首里城返去呢 首里城喺沖繩人眼中係代表住琉球王國嘅文化同象徵，情況就好似獅子山喺香港人眼中一樣，所以喺沖繩好多地方都會見到佢嘅蹤影。而喺那霸機場內，就可以自己制作一張首里城嘅明信片。 有趣嘅地方係，制作明信片嘅地方係散播喺機場唔同地方，共有四個。喺Check point度係可以搵到提示，之後就係考對機場嘅熟悉程度。當搵齊四個印章之後，就可以合成一個首里城嘅明信片出黎，有興趣嘅朋友可以帶埋小朋友一齊喺機場黎一場冒險之旅。 PS. 去沖繩的話，記得搵我哋租車  #沖繩旅遊  #沖繩 #自駕遊 #香港人 #Okinawa #o_rentkuruma FB:  老hike都移民

一講到日本著名嘅建築物，神社應該會佔一席位，但神社入面其實參拜緊啲咩？究竟要俾幾多香油先好呢？今日就分享一下。 分享神社之前，需要先講緊一個宗教 — 神道教 神道教係一個日本傳統宗教，遠自公元前已經有歷史記載。信奉「天地萬物皆有靈」，將世間萬物令人敬畏或祟拜嘅都視為「神」，由大自然到人、物、甚至石頭都一切都可以去崇拜，就連福氣、災厄、疾病依啲抽象概念嘅事都可以計算在內。所以神道教所拜嘅神之多，又被稱為「八百萬神」。 唔單止會崇拜神，就連妖魔鬼怪都冇問題，因為佢咃對神嘅定義係「神係任何令人感到恐懼及敬畏嘅任何事物或現象，神、佛、魔、人都係無分別」。 另外佢哋相信一件人工製成嘅物件，被使用時間超過99年之後，就會獲得生命成妖怪，又名「九十九神」。 而神社，就係為神道教提供地方舉行祭祀等儀式嘅地方，所以可以話每個神社內嘅祭神都唔一樣，不過都有大路嘅如：造物神、日神、月神、火神、風神、海神、山神等等，亦都會有以天皇做祭神如：八幡神。 因為神社係屬於神聖嘅地方，所以神社嘅結構係有精心設計過，神社嘅四圍由好多樹木嘅森林組成，又稱為「鎮守之森」。而樹林內會有樹林被稱為「御神木」，之後會將御神木用「注連繩」連住，喺注連繩上面再綁上白色嘅「紙垂」，然後同鳥居連上將入口隔離。 而大多數神社都係由鳥居、石級、參道、手水舍、拜殿/幣殿、主殿、賽銭箱等組成 神社內建築設施範例圖 （參考文獻：《神道之本》學習研究社出版） 圖示：①鳥居；②石段；③參道；④手水舍；⑤燈籠；⑥神樂殿；⑦社務所 / 納札所；⑧繪馬掛；⑨攝末社；⑩狛犬；⑪拜殿；⑫瑞垣；⑬本殿 。 因為神社係屬一個聖域，所以要跟從以下步驟參拜： 1. 進入「烏居」前，先向鳥居輕微一鞠躬。 2. 穿過石級，到達「參道」 3. 去「手水舍」清潔自己雙手同漱口 清潔方式：使用木勺，洗左手→洗右手→水倒去左手中漱口→洗左手→最後用水清洗木勺柄。 4. 入殿後，喺「賽銭箱」前對「御神體」先一鞠躬，之後投入香油錢（お賽銭）後再搖鈴，之後兩拜兩拍手一拜，再許願（心中默許），完成後再鞠一次躬就完成。 至於香油錢添幾多好呢，傳統上就冇指定嘅，無論一円定係一万円都無所謂，隨心就好了，不過對應返日文，唔同金額就有唔同嘅意義，以下會介紹一部份： 5円：有緣（ご縁） 11円：好緣（いい縁） 15円：十分有緣（十分なご縁） 25円：兩倍有緣（二重にご縁） 41円：...